புற்றுநோய்க்காரியின் சிரிப்பு..

புற்றுநோய்க்காரியின் சிரிப்பு..


“பாட்டி ரொம்ப அழகா இருக்க”
மிச்சமிருந்த மூன்று முடியும்
உதிர்ந்த சோகத்தில்
உம்மென்று திரும்பியவள் தலையில்
தொப்பி வைத்துச் சொன்னாள் பேத்தி
பொக்கை தெரியாமல் சிரித்தாள் கிழவி….
——————————————————————————————————–
பொங்கலுக்கு நாள் குறிக்கப்பட்ட
எழுவது வயதுக் கிழவி..
கண்ணீர் துடைத்துக் கொண்டாள்,
பக்கத்துப் படுக்கையில்
இரண்டைக் கடக்காத குழந்தை கண்டு…
——————————————————————————————————–
நாலு மாசமே கஷ்டம்தான்
உதட்டைப் பிதுக்கிய
மருத்துவரைவிட
“100 வயசு கெழவி உனக்கு”
என்று மணியடித்த
பூசாரி நம்பகமாகத் தெரிந்தார்
நாத்தீகக் கிழவிக்கு….
*****************************************************************************************************